Luke 4

Satan re Jisas rene seilam.

(Mat 4:1-11; Mak 1:12-13)

1Jisas re Jordan Peik mesegenen yim, God Reri Wow re eterkene temenem, re Jisas rene panen re tamekene bo emik yin temenem. 2Neir tame pesri ok, yabel tame pesri ok (40), re etek temenem. Jisas re awos be abem, re bupo me temenem. Yuri er yabel aboyei legem, re kwoi sam, gambo remri keryen yen, Satan, re yan rene seilam. 3Satan re rene op wem. Ne God reri yen sekene temente, ne wetek, gwor pa rem nakwu tete, ne poten ate. Ne etop nente, an lan op wete. Ne God Eterri yen. 4Jisas re rene sein op wem. God reri siglow re op webo. Tatame rem awoswou ate habote, rem heyar be temente.

5Sene Satan re Jisas rene panen kwowke yawun Jisas rene agetage aboyei nowselri kwom peteram. 6Re Jisas rene op wem. An nene er kwom newote, ne er kwom panen site. Aboyei nugwape yenbo kanbo wos er kwomke tetane, an nene ab newokeipte. Et wos aboyei et areri. An yike tamene newote wete, ankene newote. 7Ne gulke pan anne lom yokwote, aboyei wos an nene newote. 8Jisas re rene sein op wem. God reri siglow op webo. Kem Keryen Yen God eternewou lom yokwobet, eternewou yaku nenbet.

9Sene Satan re Jisas rene Jerusalem kwomke panen yim. Re rene God Reri Kwobor magelke panen yawun tetem, re rene op wem. Ne God Reri Yen temente, ne opu kirpen war. 10God reri siglow op webo. God re reri kwomri tame remne werasen yate, rem nene kwobo late. 11Tuma sene op webo. Neri tewo pak be pete, rem nene letke poten ne heyar waren tetete. 12Op wem, Jisas re rene sein op wem. God reri siglow op webo. God re neri Keryen Yen, ne rene kap seilate. 13Satan re rene seilaweyem, re rene mesegenen yim, re agerbo yabelke rene sene seilate kowem.

Jisas re Galilike yim, God Reri Wow re rene kitimena newom, re yaku tasen nenem.

(Sapta 4:14—9:50)

Jisas re Galili yokwok yaku tobotam.

(Mat 4:12-17; Mak 1:14-15)

14God Reri Wow re Jisas eterkene temenem, re Galili yokwok sene yim. Jisas reri nenem wos kwomri kwomri tatame rem metem. 15Jisas re God reri akek wuren tatame remne tuma yenbo wesowbem, rem reri sig bukre webem.

Nasaret kwomri tatame rem Jisas rene magel tayem.

(Mat 13:53-58; Mak 6:1-6)

16Yuri Jisas re Nasaret kwomke yim. Kiyi re eisow yen temenem, re Nasaret kwomke temenem. Re kiyi nenbemkap, egesi yabelke re God reri akek wurem. Re God Reri Siglowke basrasmenem tuma late tetem. 17Rem Aisaia reri basrasem siglow rene newom, re tuma wuri sopen lan re op wem.

18Keryen Yen Reri Wow re arenke tetane.
Re anne lebam, an woskene bo
tatame remne tuma yenbo
wesowte.
Re anne werasen yan tuma wesowte, ake
yaperke tetane tame rem
ake yaper mesegenen sene yite.
Le si tame rem heyar sene late.
Re anne werasen yam, an pap yaper metbo
tatame remne tuma yenbo
wesowte, rem pap kwuye mette.
19Re anne werasen yam, God re reri tatame remne
potte yabelri tuma an remne etop wesowte.
20Op wem, Jisas re siglow sene gwolbekerem, re ake lakere tame rene sene newon re sene ek sim. Nugwape tatame rem God reri akek simenem, rem eternewou leklek temenem.

21Re remne op wem. God reri basrasem tuma kem gwopte metye, er tuma re gwopte sekene teye. 22Op wem, tatame rem reri sig bukre wem. Re remne tuma yenbo heyar wemke, rem op habo op habon op wem. Er tame re Josep eterri yen. Mapurke re er tuma webo? 23Jisas re remne sein op wem. Kem tuma anne op wete. Ne tatame remne heyar nenbo tame, ne kworer heyar nente. Kem anne sene op wete. Neri Kaperneamke nenem wos nemri metemkap, ne neri maime kwomke sene nente. 24An kemne sekeneker webo. Tuma wesow tame reri kwomri tatame rem rene pap be yewobo, rem rene magel taibo. 25Metye. An kemne sekeneker webo. Kiyi Elaija re temenem, nugwape wane ta rem Israelke temenem. Nabe mur, liyp letrane kelare wuri kerem, mou be tibem. Nugwape tatame kwomke kwomke rem akwoi sim. 26God re Elaija rene Israelri wane ta etemne be werasen yim. Yehow. Re rene werasen Sarefat kwomri wane ta etetnewou lasyim. Sarefat kwom et Saidon yokwok tetane. 27Sene God Reri Tuma wesowbem tame, Elaija, re temenem, nugwape nomape tame rem Israelke temenem. God re remne heyar be nenem. Yehow. Siria yokwori tame, Naman, eternewou God re rene heyar nenem.

28Tatame rem God reri akek temenem, rem Jisas reri wem tuma etop metem, rem kenakem pap bukre yokem. 29Rem teten Jisas rene keikeren rene ya yokwo keren kwom geike liyten wurem. Rem remri kwom sitene kwowke rene panen yawum. Rem rene etek sokwunte nenem. 30Re etemri borke yin remne mesegenem.

Jisas re gambo wekrokem.

(Mak 1:21-28)

31Jisas re Kaperneam kwomke yim. Kaperneam kwom et Galili yokwok tetane. Egesi Yabel re God reri akek wuren remne tuma peikem. 32Rem reri tuma metem, rem danekene sekem. Keryen yen remri wesowbemkap re remne etopkap wesowbem, eker rem danekene sekem. 33God reri akek temenem tame rene gambo gureremenem, re tuma yaye op wem. 34Jisas, ne Nasaret kwomri tame. Ne kap nemne berke nente? Ne nemne kap botkute yawo? Nem nene latene. Ne God eterri tame yenbo. Re nene werasen yam. 35Jisas re rene tuma sein op wem. Ne elen me te. Ne er tame rene mesegenen yite. Op wem, gambo re tame rene etemri bitmik selke teren rene mesegenen ek yim. Gambo re rene yaper be nenem, re bupo me yim. 36Nugwape tatame rem etop lam, rem danekene sekem, rem etemwou etemwou op wem. Reri weye tuma et mapkap tuma? Re kitimenakene tamekap webo, gambo rem reri tuma metbo, rem tame remne mesegenen yibo. 37Nugwape kwom rem Jisas reri nenem wos aboyei metkeipem.

Jisas re Pita reri owyi tene heyarem.

(Mat 8:14-15; Mak 1:29-31)

38Jisas re God reri ake mesegenen yin Saimon eterri akek wurem. Saimon reri owyit te yaper metbem, wesom kirkir nignigbem, rem Jisas rene tene kwobo late wem. 39Re yin tukna tiy meknik tetem, teri yaper kwuye mette wem. Op tem, teri yaper boyem, agetage te wayen teten remne awos nenem.

Jisas re nugwape tatame remne heyarem.

(Mat 8:16-17; Mak 1:32-34)

40Yabel warbem, tatame rem hekna habana sikanuma nenbem tametiy remne Jisas eterne panen yam. Jisas re reri let nugwape tatame remne wulare wulare keren yin rem kwuye metem. 41Gambo yaper rem nugwape tatame remne mesegenen yim. Rem yaye op wem. Ne God Eterri yen. Jisas re remne sewayen op wem. Kem etop mane wete.

Jisas re kwomke kwomke yin tuma wesowbem.

(Mak 1:35-39)

42Ei berabemke, Jisas re er kwom mesegenen tamekene bo emik yim. Tatame rem rene sopen yin lam, rem rene keikerete wem. Rem op habom. Re nemne kap mesegenen yite. 43Re remne op wem. God re anne werasen yam, an God reri kwom panen site tuma yenbo agerbo kwomke wesowen sewurte. 44Op wemke, re Judia nowselke sewurbem, re God reri akek wuren tatame remne God Reri Tuma yenbo wesowbem.